சினிமா பெரடிசோ

கோவா- ஹோமோ கேள்விகள்.

2010-02-12T23:00:00.000-08:00

இரண்டு ஆண்களுக்கிடையில் பாலியல் உறவு சாத்தியம் அல்லது அவர்களுக்கான காதல், பொறாமை இருக்கும் என்பதையே அறியாத கிராம பெண்களுடன் கோவா திரைப்படத்திற்கு சென்றுவிட்டு, சம்பத்-அர்விந்த் காட்சிகளில் நெளிய வேண்டியதாயிற்று.

என் அக்கா, அவர்களை 9 என நினைத்து கொண்டாள். திருநங்கை எனுமளவிற்கு அவள் பதிவுலகின் முகவரி அறிந்தவளல்ல. அவளுக்கு எப்படி புரிய வைப்பது என யோசித்து, மண்டை காய்ந்து அப்புறம் வசதியாய் மறந்தும் விட்டேன். படம் முடிவதற்குள் ஹோமோ கான்செப்ட் அவளுக்கு வசப்பட்டதா எனத் தெரியவில்லை.

ஆனால், அவளின் கேள்விகள் என்னை வெம்பி நொங்கெடுத்துக்கொண்டே இருந்தது. ஹோமோ குறித்து பல அலசல்கள் பதிவுலகில் நிகழ்த்தியாயிற்று. சென்னை’யில் அவர்களின் எண்ணிக்கை அதிகம் என்றே நினைக்கிறேன். அல்லது, சென்னையில் நான் பொதுபோக்குவரத்தை பயன்படுத்தியதால் கிட்டிய அனுபவமாகவும் இருக்கலாம்.

அந்த காலத்தில், திட்டு வாங்கிக்கொண்டவது பெண்கள் பக்கம் சென்றுவிடுவேன். ஆண்கள் பக்கம் நின்றால் குறைந்தது 2 ஓரினச்சேர்க்கையாளர்கள் நம்மை தடவிவிட்டு ஒரு ரொமாண்டிக் லுக் விடுவார்கள். அலறி புடைத்து, கூட்டத்தில் புகுந்து முன்சென்றால் அங்கு பெண்களிடம் இடிபட வேண்டி இருக்கும். சில அத்தைகள் வலியவந்து உரச ஆரம்பித்து விடும். பேருந்தின் சூழல் மக்களின் அடிப்படை உணர்ச்சிகளை எளிதில் தட்டிவிடுவதாகவே நான் கருதுவதுண்டு.

தியேட்டருக்கு தனியாக சென்று, மயிரிழையில் எஸ்’ஸாகிய அனுபவமும் உண்டு. Gay'க்கு காரணியான Gene'ஐ கண்டுபிடித்துவிட்டார்கள் எனவே மக்களை நொந்து பயனில்லை. அவர்களுடன் வாழ கற்றுக்கொள்வதே மனிதாபிமானமாகும். சில நாட்களுக்கு முன் Inner Ring Road'ல் ஒரு Gay Couple’ஐ காண நேர்ந்தது. வரும் நாட்களில் இது மிகவும் வெளிப்படையாகும்.

ஹோமோ, gay என்ற buffer விட்டே நம் பிள்ளைகளை வளர்க்க வேண்டிய சூழலில் இருக்கிறேம். Adventure'க்காக ஹோமோ’வை முயற்சிப்பவர்களும் உண்டு. இனி Bisexual பரவலாக எடுத்தாளப்படும் ஒரு சொல்லாக இருக்கலாம். காமெடி பீஸாக இல்லாமல், சற்று முதிர்ச்சியுடன் ஹோமோ விடயத்தை அனுகிய வெங்கட்பிரபு பாராட்டத்தக்கவர். இது ஒரு நல்ல தொடக்கம் மட்டுமே.

Milk போன்ற படங்களின் சாத்தியம் வருங்கால தமிழகத்தில் நடந்தேறலாம்.

ஹோமோக்களை நாகரீகமாக எதிர்கொள்ளுவது, அவர்களின் குற்ற

உணர்வை அதிரிக்காமல் சமூகத்தோடு அரவணைக்க உதவும். Hey I'm not into it.. கொஞ்சம் தள்ளி நிக்கிறீங்களா?? அலுவலகத்திலும் இதுபோன்ற சூழலை எதிர்கொள்ள நம்மை பதப்படுத்திகொள்வது நன்று.

The Bird Cage அருமையான ஹோமோ குடும்ப நகைச்சுவை படம். சம்பத் பாத்திரத்தை காணும் பொழுது அந்த படம் தான் நினைவிலாடியது. Happy Together மிகவும் உணர்வுபூர்வமான படம். உறவென்பது ஆணுக்கும் பெண்ணுக்குமானது என்ற தளத்திலேயே வாழ்ந்து மடிந்தவர்கள் மகிழ்ச்சியானவர்களாய் இருந்திருக்ககூடும். அப்படி நினைத்து, அது கண் முன்னே சரியக்காணும் என் அக்கா போன்றவர்களும், அதற்கான எடுகோள்களை வெளிப்படையாக நிறுவ முடியாமல் இருட்டை வெறிக்கும் நானும்.. வரும் நாட்களில் இல்லாமல் போகலாம். Gay, Les, Straight, Bi முதலிய அன்றாட சொல்லாடல்களுடன் விரைந்து கொண்டிருக்கும் எதிர்காலம்.

சிறந்த இயக்குநர் தான்.. ஆனா சிறந்த படமல்ல

2010-01-27T05:35:00.000-08:00

விருதுகளின் காமெடியில் இது ஒரு Irony. சிறந்த இயக்குநர் இயக்கியது சிறந்த படமல்ல! சிறந்த படத்தை இயக்கியவர் சிறந்த இயக்குநருமல்ல. அவ்வ்வ்வ்வ்வ். உதாரணத்துக்கு உள்ளூர் பிட் ஒன்றை எடுத்துக்கொள்ளுவோம்.

பாலா இயக்கியது ஒரே படம் ‘ நான் கடவுள்’. கவனிக்கவும் அது அந்த ஆண்டிற்கான சிறந்த படம் அல்ல. ஆனால “நான் கடவுள்” படத்தை இயக்கிய பாலா சிறந்த இயக்குநர். அவர் இயக்கியது “நான் கடவுள்” மட்டுமே எனுப் பட்சத்தில், அந்த படத்தை சிறந்த முறையில் படைத்தளித்ததற்காக நம் பாலா’விற்கு சிறந்த இயக்குநர் விருது! ஆனால் அந்தப் படம் சிறந்த படமல்ல. :). மாப்பிள்ள அவருதான்.. ஆனா அவரு போட்டுருக்குற சட்டை என்னோடது.. .

மற்ற விருதுகள் எந்த விதமானாலும் அமையலாம். சில படைப்பில் கேமரா, இசை, பாடல் என எவரேனும் முன்னிலை பெறலாம், அது ஒப்புகொள்ள தக்கதே. ஆனால் இயக்குநரின் ஒரே பங்களிப்பு, இயக்கம். அவர் இயக்கியது ஒரே படம், அவர் தான் அந்த ஆண்டின் சிறந்த இயக்குநர்.. ஆனால் மக்களே அவர் இயக்கியது சிறந்த படமல்ல.. அவ்வாறெனின் எந்த படத்தை இயக்கியதற்காக அவருக்கு சிறந்த இயக்குநர் விருது?? :)

பாலா: என்ன வெச்சி காமெடி கீமெடி பண்ணலயே... அவ்வ்வ்வ்வ்வ்வ்வ்.

இப்பதிவில் பாலா ஒரு எச்சாம்பிள் மட்டுமே.. உலமெலாம் இதே கூத்துதான். இதை எதிர்த்து பல இயக்குநர்கள் throat saliva dryஆகிற அளவு கத்தி ஆயிற்று. இருந்தாலும் விருது கமிட்டிகளின் வருடாந்திர காமெடியில் இந்த மெனு கண்டிப்பாக இருக்கும், பல ஆண்டுகளில். சில நேரங்களில், சில இயக்குநர்கள் மட்டுமே, சிறந்த படத்தயும் இயக்கி, சிறந்த் இயக்குநர்களாகவும் அறியப்பட்டிருக்கிறார்கள்.

இதில் இரு வேறு தியரிகள் அடங்கும்:

1. படம் மொக்கை, ஆனா இயக்குநர் ஆஹா

2. படம் ஓஹோ, ஆனா இயக்குநர் ம்ஹீம்.. (நீ இன்னும் வளரனும் தம்பி)

3. இந்த வருடம் எவனும் மாட்டல.. safe zone'ல எவனையாவது அமுக்கி போடு. :)

நான் கடவுள் மொக்கை, பாலா ஆஹா... ஓசி டீக்குடித்து ஓட்டு போடும் முன் கமிட்டி.. இந்த வருடம் எவனும் மாட்டல.. safe zone'ல எவனையாவது அமுக்கி போடு. :)

Classic Vintage Retro - Down the memory lane

2009-09-18T07:51:00.000-07:00

மூன்று பாடல்கள்:

1. Bang Bang - Kill Bill Vol 1

2. Summer wine - Villie Volo

3. Dave Mathews / Carlos Santana- Love of my life

மூன்றுமே எனக்கு மிக பிடித்த பாடல்கள். முதல் பாடல் Kill Bill, எனக்கு மிகப்பிடித்த படம், பாடல்.

சென்ற வருடம் இரண்டாவது பாடலை மிகவும் விரும்பி கேட்டுக்கொண்டிருந்தேன். இன்று ஏனோ கேட்டவேண்டும் போல இருந்தது யூடியூபை தட்டினேன்.

மூன்றாவது Dave Mathews, இந்த ஒரு பாடலின் மூலம் எனக்கு மிகவும் பிடித்த குரல், Carlos என் மனதிற்கு பிடித்த கிட்டாரிஸ்ட்.

இந்த மூன்று பாடல்களில் முதலிரண்டு பாடல் Nancy Sinatara என்ற பாடகி 60களில் பாடியது என இப்பொழுது தான் அறிந்தேன். அருமையான பாடல்கள்.

மூன்றாவது பாடல், Brahms #3 symphony என இப்பொழுது தான் அறிந்தேன். மிகவும் இனிமையான சிம்பொனி. முதலில் இதை கேட்டு பின்பு பாடலை கேட்கும்பொழுது, அந்த பாடலின் இனிமைக்கான காரணம் பிடிபடுகிறது.

இசை ஒரு மாய உலகம், மது புட்டி... பழமை மேலும் மேலும் சுவை கூட்டுகிறது. அதை புதிய வடிவில் தர முற்படும் இந்த தலைமுறையின் கனவுகளின் சிறகுகளில் புதிய பரிமாணத்தில் மெருகேறி பறக்கிறது Classical Music. இந்த மூன்று பாடல்களும் இன்றைய சிலிர்ப்பிற்கான காரணம், பெய்யென பெய்யும் மழையைத் தாண்டி..

The God Father vs The Shawshank Redemption

2009-08-18T20:43:00.000-07:00

IMDBயின் அறிமுகம் 2004ல் ஆரம்பித்தது. Residential MBA என்பதால், மொத்த இரண்டு வருடங்களும் கல்லூரி வளாகத்தினுள்ளே கழிந்துவிட்டது, மேலும் அது Academy என்றே அழைக்கப்பட்டது-கல்லூரி அல்ல :). 360ல் - 300 மக்கள் வடக்கிலிருந்து வந்தவர்கள் அல்லது Non-SouthIndians. விதவிதமான் கேரக்டர்கள்-இடுப்பிலிருந்து எப்போது விழுமோ என நாம் பயப்படும் அளவிற்கு பேண்ட் அணிவது, குளிக்காமல் சால்வையை போர்த்தி அலையும் பெண்கள், குறுந்தாடியுடன் Metallica, Fuck, Bitch என அடித்தொண்டையில் Machismo பிலிம் விடுவது என amazing line up.

இந்த கூட்டத்தில், சினிமா பீலா விடும் கூட்டத்தில் நானும் ஒரு அங்கம். அவ்வப்போது வித்தியாசமாக வந்து நம்மை நிலைகுலையச்செய்யும் தமிழ்படங்களை அவர்களுக்கு காட்டி இம்சையை கூட்டுவது என் வாடிக்கை. காதல், கஜினி, ராம், ஆட்டோகிராப் இதெல்லாம் அவர்களின் விருப்பப்படங்கள். அந்த திகு(திரைப்படக் குழு) சுவாதித்து, விவாதித்து அலசி ஆராய்ந்த படம் -The GodFather.

இந்த படத்தை Strategic Leadership பாடத்திற்கான Book Reviewல் சேர்க்கும் வரை எங்கள் அலும்பு ஓயவில்லை. அடிக்கடி அந்த படத்தின் வசனங்களை அள்ளிவிட்டு Corleone குடும்பத்து வாரிசாகவே பாவித்து இன்பம் காண்போம். I'll make an offer he cant refuse, அப்புறம் He is a reasonable Man அதில் மிகவும் வழமையானது. IMDB ஆரம்பித்த நாள் முதல், GF முதல் இடத்தை தக்க வைத்து நெடுநாள் ஆட்சி புரிந்தது.

திரைப்படங்கள் அறியப்பட்ட உலகின் அனைத்து பகுதியிலும் மிகவும் மதித்து போற்றப்படும் படைப்பு GF. மாபியா கட்டமைப்பை மிகநேர்த்தியாக சித்தரித்து, இத்தாலிய அமெரிக்கர்களின் வன்முறை பின்புலத்தை வெளிக்கொணர்ந்த திரைப்படம் அது. இப்படைப்பை கண்டபின்பு, FrancisFrod Coppolla, MarlonB, Al Pacino, Andy Garcia,Sofia என ஒரு பெரிய பட்டியலின் கலைபரிமாண பயணத்தை கண்டறியும் வாய்ப்பு கிடைத்தது.

ஓட்டுக்களால் மட்டுமின்றி, இயல்பாகவே எந்த ஒரு தேசத்தினர் பார்த்தாலும், மிகவும் ஒன்றி, அடையாளங்காணக்கூடிய கதை, நிகரில் தொழில்நுட்ப மேம்பாடு, மனதை உருக்கும் இத்தாலியன் இசை, அருமையான பாத்திர திறன்வெளிப்பாடு என GF ஒரு மைல்கல் திரைப்படம். மூன்று பாகங்களும் ஒருவித Cult Following, போதை, கலைவெறி, படைப்புடன் ஒன்றுதல் என ரசவாதத்தை நிகழ்த்தும் வீரியங்கொண்டது. இப்படத்தின் சாயல், பாதிப்பு, தழுவல் இல்லாத ரவுடியிச படங்களே இல்லை என துணிந்து கூறலாம். நிற்க.

1994 ஒரு மேஜிக் வருடம். Pulp Fiction, Forrest Gump மற்றும் The Shawshank Redemption என மூன்று திரைமைல்கல் படைப்புகள் வெளியான வருடம். Forrest Gump ன் எளிமைக்கும், Feel Good Factorக்கு முன்பு TSR வந்த இடம் தெரியவில்லை. வந்த வேகத்தில் படம் பெட்டிக்குள் முடங்கியது. ஒரு பக்கம் Pulp Fiction மறுபக்கம் FG, TSR வெளிச்சத்தில் மறைந்த மின்மினியாயிற்று.

அந்த படத்தின் அடியாழத்தை, அது சொல்ல வரும் கருத்தை, அதன் ஆன்மாவை அறிந்து கொள்ள உலகத்திற்கு நாள் பிடித்தது. எதிராளுமை படங்கள் மிகஎளிதில் மக்கள் மனதில் இடம்பிடித்து விடும். அதற்கான வசீகர வசன, காமிரா கோண வண்ண விளையாட்டை இயக்குனர்கள் நேர்த்தியாக நிகழ்த்தி விடுவார்கள். ”ரொம்ப நல்லவன்” வகை படைப்புகள் மனதில் இடம்பிடிக்க நாள் ஆகிறது. மெல்ல மெல்ல உலகின் பார்வை இந்த படத்தின் மீது விழ ஆரம்பித்தது.

தனிமனித மன உறுதியின், நம்பிக்கையின், சுதந்திரத்தின் தேவைக்கான அதன் தாகத்தை, அதை அடைவதற்காக அதுமேற்கொள்ளும் பயணத்தை, இடையினில் மனம் தளர்வுறாது அப்பயணத்தை தொடர்வதை, அப்பயணத்தினூடே மற்றவர்களுக்கு ஒரு படித்துறை என திகழ்வது என நேர்மையான வாழ்விற்கான அனைத்து காரணிகளையும் இந்த திரைப்படம் நமக்கு உணர்த்தி செல்கிறது.

சுதந்திரத்தின் அருமையை உணர்த்த சிறைச்சாலையை விட சிறந்த இடம் எது? அந்த சிறைசாலையின் ஒவ்வெரு செங்கல்லும் தன் வாழ்நாள் முழுதும் அவன் வெயரை சுவாசிக்கும் வகையில் ஒரு அழியாத சுவடை விட்டுச்செல்லும் கதைநாயகன், விடுதலை வேட்கை கொண்ட எந்த ஒருஆன்மாவுக்குமான எடுகோள். நம்பிக்கையின் வலிமையை, இதைவிட அழுத்தமாக சொல்லும் திரைப்படத்தை நான் இதுவரை கண்டதில்லை.

ஒவ்வெரு மயிற்காலையும் தனித்தனியாக பிடித்து ஆட்டி நம்மை நெக்குருகச் செய்யும் படைப்பு இது. எனவே தான் GF என்னும் உலகின் மிகவும் பிரபலமான ஒரு திரைஅனுபவத்தை பின்னுக்கு தள்ளி இன்று IMDBல் முன்னிலை வகிக்கிறது.

GFன் வெறிகொண்ட ரசிகன் என்ற வகையில் இது சற்று வருத்தமே என்றாலும், திரைமாணவனாக The Shwashank Redemption ஒரு மறக்க முடியா திரைபிரமிப்பு. விடுதலை தினங்களில் இப்பொழுது சின்னத்திரை ஊடகங்கள் இந்த படத்தை ஒளிபரப்ப ஆரம்பித்து விட்டது.

Tim Robins, MorganFreeman என்ற இரண்டு கரைகளுக்கிடையில் கதை ஆழ்ந்த மௌனத்துடன், எதிர்பார்க்கா இடத்தில் பேரருவி என வீழ்ந்து அதன் சாரலில் நம்மை நனையச் செய்து, Human Spirit என்னும் பேராழியில் நம்மை கரைக்கிறது.

உலகையே தன்வசம் கட்டி இழுத்த GF என்ற திரைபிரம்மாண்டத்தை முந்தி இப்படம் இடம்பிடித்திருப்பது, அப்படைப்புபில் நிகழும் முதன்மை பாத்திரத்தின் மன உறுதிக்கு அச்சாரமாக திகழ்கிறது. இனிஒரு GF, இனி ஒரு TSR வரும் வரை Let's bask in the glory of this twin pillers.

QT வாரம் - A short take on his works

2009-03-14T03:55:00.000-07:00

ஒரு புள்ளியை 360டிகிரியாக பகுக்க வாய்ப்பிருந்தும், புள்ளியை புள்ளியாக மட்டுமே பார்க்கும் தட்டையான மனப்போக்கு பல படைப்பாளிகளுக்கு இருக்கிறது. வேறுகோணத்தில் பார்க்கமுற்படுபவர்களை மனநிலை பிறழ்ந்தவன் என சமுதாயம் முத்திரை குத்தும். நாள்முழுதும் நடக்கும் நிகழ்ச்சிகளை மனது அட்டவணைப்படுத்துகையில் சில காட்சிகள் முன்னுக்கு பின்னாக பதியும், காலக்குழப்பம், காட்சிக்குழப்பம் என ஒரு தெளிவான அட்டவணை அமைய சற்று நேரம் எடுத்துக்கொள்ளும்.

ஒரு தேர்ந்த புதிரைப்போல மிகுந்த ஆவலை நம்முள் கிளர்த்தும் திறன் கொண்டவை கு.ட’வின் படைப்புகள். திரைமொழி அரிச்சுவட்டில் பல புதிய வார்த்தைகளை புகுத்திய பெருமை இவருக்கு உண்டு. தன் படைப்புகளுக்கென கட்டமைக்கப்பட்ட படிமங்களுடனே ஒவ்வொரு புதுமுயற்சியையும் தருவதால், பழைய மொந்தை பழைய கள் என ஒதுக்கிவிட முடியாது.

எடுத்துக்காட்டாக: 1. நீங்கள் கள் குடிக்க செல்கிறீர்கள்: அடந்த பனங்காடு, நெடிய பனை மரம், பள பள கத்தி, உச்சி வெயில், ஒற்றையடி பாதை. கள் குடித்தாகிவிட்டது.

2. நீங்கள் கள் குடிக்க செல்கிறீர்கள்: வெட்டவெளி, அங்கொன்றும் இங்கொன்றூமாக பனை, ஒரு அழகான பெண் கள் விற்கிறாள், அவளது அண்ணன் மரமேறி. அவள் கண்ணும் கத்தியும் ஒரே பளபளப்பில் இருக்கிறது. ஒற்றைப்பனைக்கு பக்கத்தில் ரெட்டை பனையாக அவள் அண்ணன். நீங்கள் கள்’ குடிக்கிறீர்கள்.

கள் குடிக்கும் ஒரே செயல்- வெவ்வேறு அனுபவங்கள். வெவ்வேறு படிமங்கள். இது ஒருவகையான படைப்பாளுமை.

மற்றொருவிதம் - நீங்கள் கள், சாராயம், பப் என மூன்று விதமான இடங்களுக்கு செல்கிறீர்கள். ஆனால் அந்த இடங்களுக்கென சில படிமங்கள் சமைந்திருக்கிறது. கள்ளுக்கடை மொந்தை சாராய்க்கடையின் பக்கம் விற்கும் கூழ் போல தெரிகிறது. சாராயக்கடையின் உள்ளே இருக்கும் அரைகுறை ஆடை சுவரொட்டி Pubல் இருக்கும் Hip Gal போலவே இருக்கிறது. அந்த Hip Gal கள்ளுக்கடை பனைமரத்தின் தங்கை போல இருக்கிறாள். நீங்கள் கள் குடிக்கிறீர்கள், சாராயம் அடிக்கிறீர்கள், and chilling out @ the pub.

மப்பில் ஒரு கலவையான அனுபவம் எல்லாம் சேர்ந்த ஒன்றாக உங்கள் போதையை கூட்டுகிறது. கு.டா’வின் திரைப்படைப்புகள் மேற்கூறிய வகையை சார்ந்தது. படிமங்கள் சமைக்கப்பட்டு, யுக்திகள் நிறுவப்பட்ட ஒரு திரையில் கதைவேறு, களம் வேறு, அனுபவம் வேறு.

அடிப்படை யுக்திகள்:

1. முன்பின்னாக கதை சொல்வது. படத்தின் முடிவில் உயிருடன் இருக்கும் பாத்திரம் படத்தின் இடையிலேயே உயிரை விட்டுவிட்டு இருக்கும். (Pulp Fiction)

2. ஒரு படைப்பிற்கும் அடுத்த படைப்பிற்கும் படிமங்களின் மூலம் தொடர்பு ஏற்படுத்துவது. (Pulp Fiction'ல் வரும் குகூனா பர்கரின் விளம்பர மாடல் Death Proofன் கதாநாயகி Julia)

3. பெண்களின் கால்கள், பாதம், விரல்களின் மீதான அதீத மோகம். நீளமான பாதங்கள், விரல்களின் மீதான விருப்பம் அனைத்து படங்களிளும் இருக்கிறது.

4. பெண்களே இல்லாத திரைப்படம்- Reservoir Dogs - அதிகபட்ச பெண் பாத்திரங்களை கொண்ட Death Proof என முரண்களில் பயணிப்பது.

5. வன்முறையை சிலாகித்து வடிக்கும், காமிக்ஸ் மனப்பான்மை. முதல் படத்தில் இருந்து தொடரும் யுக்தி இது.

6. கார்களின் மீதான் அதீத விருப்பம். பாத்திரங்கள் பேசியபடியே நெடுந்தூரம் செல்லும் கார்பயணங்கள் அதிகமாக காணக்கிடைக்கும்.

7. முன்பே கூறீயது போல சாகச நாயகர்கள், காமிக்ஸ் வீரர்களின் போஸ்டர்கள் தனது படைப்பின் பெரும்பாலான இடங்களில் வெளியே தெரியும்.

8. ஒருவர் பேசும்போது, பேசுபவரி விட்டு கவனிப்பவரை காண்பிப்பது - God Father இதற்கு எதிர்மறையாக இருக்கும்.

9. மிகவும் நீளமான காட்சிகள் -5நிமிடம் 8 நிமிடம் என நீளும் கதையாடல்கள்.

10. கதைக்களத்தில் நம்மை மெதுமெதுவாக மூழ்கடிக்கும் அவசரமற்ற கதைநகர்த்தல். என்ன நடக்கிறது என புரிந்து கொள்ளவே அரைமணி நேரமாகிவிடுகிறது Death Proofல். இது Martin Scorcese பாணி-அவரின் The Good Fellas, Taxi Driver, Casino, Mean Streets பார்த்தவர்களுக்கு புரியும். புதைகுழியில் அமிழும் ஆட்டுக்குட்டியை போல கதை மெதுவாய் மெதுவாய் நமை உள்ளிழுக்கும்.

11. முழுக்க முழுக்க பேண்டசி அல்லது பழிவாங்கல் அல்லது திருட்டு சார்ந்த படங்கள்.

12. அடிக்கடி கருப்பு வெள்ளைக்கு மாறும் வண்ணவிளையாட்டு.

13. மகா கெட்டவார்த்தைகளை தண்ணி குடித்து தாவு தீர்க்கும் கதாபாத்திரங்கள். Its fuckin good!

14. சில நடிகர்களை திரும்ப திரும்ப உபயோகிப்பது - Samuel Jackson (Pulp fiction, Jackie Brown, Kill Bill-small one minute role, Inglorious Bastards - Pre production , Uma Truman- Pulp fiction, Kill Bill-1,2)

15. பெண்களுக்கு அதிக முக்கியத்துவம் தரும் படங்கள் (Kill Bill, Jackie Brown, Death Proof).

16. கிட்டக்கோணத்தில் பாகங்களை காட்டுவது - உதடு, கை, கால், பாதம், விரல், கண்கள்.

17. கேமராக்கோணம் என பெரிதாக அலட்டிக்கொள்ளாமல் மிகவும் இயல்பான கோணங்கள் ஆனால் பாத்திரங்கள் வித்தியாசமான கோணங்களில் தென்படும்.

18. பழைய இசையின் மீதான் அதீத விருப்பம். எப்போழுதும் கார், பப்’களில் வழியும் jAZZ, Country types.

20. கூர்மையான வசனம், இயல்பான மொழியில் பக்கம் பக்கமாக பேசும் பாத்திரங்கள்.

இப்படி பட்டியலிட்ட பின்பு திரைப்படங்கள் இவற்றின் தொகுதியாகவே தெரிவதால் - ஆழமாக செல்ல விரும்பவில்லை.

படைப்பாளுமை மற்றும் திரைமொழி, யுக்தி இவற்றின் அடைப்படையில் பட்டியலிட்டால் - Pulp Fiction, Kill Bill 1-2, Resrvior Dogs, Jackie Brown, Death Proof.

Pulp Fiction: ஒரு ரவுடி, அவன் கீழ் இரண்டு கையாள், அவன் மனைவி மற்றும் ஒரு குத்து சண்டை வீரன் தொடர்பற்ற இவர்களுக்கிடையில் ஓடும் வெவ்வேறு கதைகள் படத்தின் வெவ்வேறு கட்டங்களில் முடிவுற்று, தொடங்கிய இடத்திலேயே வந்து நிற்கும் படம் இது. அபாரமான படம். ஒருவகையான மைல்கல். திரைப்பட IMBD தர வரிசையில் 5 இடத்தில் இருக்கும்படம். திரையுக்திகளுக்காகவே ஒருபடம் இத்துனை தூரம் புகழ்பெற்றிருப்பது வியப்பிற்குறியது என்றாலும், மிகவும் ரசிக்கத்தக்க படைப்பு.

Kill Bill 1-2: காட் பாதர் பாணியில் இரண்டாம் பாகத்தில் கதைக்கான பின்புலனும், முதல் பாகத்தில் அரைவாசி கதையும் சொல்லப்படும் மிகவும் ஆர்வத்திற்குரிய படம். தனது மண ஒத்திகை கோலத்தில் கொல்லப்படும் ஒரு பெண், தப்பி பிழைத்து தன்னை கொன்றவர்களை பழிவாங்கும் கதை. பழிவாங்கல் ஒரு கலையாக, மிக மிக அழகாக சொல்லப்பட்டிருக்கும் படம். அறுந்து விழும் கால்கள் கைகள் தலைகள், ரத்தம், கத்தி என படம் ஒருவித வன்முறை உலகில் நமை ஆழ்த்துகிறது.

இரண்டாம் பாகத்தில் அந்த மணப்பெண் யார் எதற்காக கொல்கிறாள் என விரிகிறது. முதல் பாகத்தின் விறுவிறுப்போ, ஈர்ப்போ இந்த படத்தில் இல்லை, எனினும் பார்த்தாக வேண்டிய படம்.

Reservoir Dogs: கொள்ளையடிக்க போகும் ஒரு கூட்டம் போலிசிடம் மாட்டிக்கொள்கிறது. தப்பித்த அவர்கள் யார் துப்பு கொடுத்திருப்பார்கள் என ஒருவரை ஒருவர் சந்தேகப்படும், முழுக்க முழுக்க வசனத்தின் தயவில் நகரும் படம். இயக்குனரின் முதல் படம். நல்ல முயற்சி.

Jackie Brown: துணிக்கடையில் வரும் Time Lapsing காட்சி மிகப் பிரசித்தம். நேர்மையான படம். இயக்குனரின் துடுக்குதனம் எதுவுமில்லாமல் தெள்ளிய நீரோடை படம். ரிவால்வர் ரீட்டா பாத்திரத்தில் தன் இளமைக்காலங்களில் கலக்கிய ஒரு நாயகியை, அவரின் 40களில் இந்த படத்திற்காக நடிக்க வைத்து இருப்பார். அவர் தான் ஜாக்கி பிரவுன். ரசிக்கத்தக்க படம். Samuel Jackson அருமையாக நடித்திருப்பார்.

Death Proof: எனக்கு பிடித்தது. நிறைய பேருக்கு பிடிக்காமலும் போகலாம். 1 மணி நேரம் ஒன்றுமே இல்லாமல் வெறும் வசனங்கள் ஒன்றிரண்டு நடனம் நிறைய பாடல் என செல்லும் படம், அதற்கப்புறம் முழுக்க முழுக்க ஒரு கார் சேசிங் படமாக மாறி விறுவிறுப்பாக முடிகிறது. பழைய GrindHouse நாயகிகளுக்கு சமர்ப்பணமாக எடுக்கப்பட்டது இந்தப்படம். ஒரு மணிநேரம் Julia வின் நீளமான அழகான கால்களை ரசித்து ரசித்து காட்டும் இயக்குனர், கார் விபத்தில் அந்த கால் மட்டும் துண்டாகி பறந்து சென்று நடுநிசி தார்ரோட்டில் விழுவதை அழகாக காட்டுவார், அதனேடு சில சதைத்துணுக்கு மற்றும் நரம்புகள். Heights!

மனதை உருக்கும் படங்கள் ஆயிரம் இருக்கிறது. வெவ்வேறு மொழிகளில், அவரவர் கலாச்சாரத்தை முன்வைத்து அவை பேசிச்செல்லும் கருத்துக்கள் ஆயிரம் இருக்கலாம். கு.டா’வின் படைப்புகள் அத்தகையன அல்ல. திரையுக்தி, ஒருவித அழகியல் வன்மம், அதிர்ச்சி எனும் பிரிவிகளில் தவிர்க்க முடியாத இயக்குனர். அவரின் அனைத்து படங்களையும் நீங்கள் ரசிக்கலாம். திரையனுபவத்தின் இன்னொரு பரிமாணம் Quentin Tarantion. Hats Off!

QT- வாரம். The Prelude.

2009-03-05T01:24:00.001-08:00

திரைப்படம் என்பது கதை, திரைக்கதை, அறிமுகம் பாடல் என நேர்கோட்டில் செல்லும் பாடப்புத்தகம் அல்ல, இயக்குனரின் ஆளுமைக்கு ஏற்ப, மிக கவனமாக சிதைக்கப்பட்டு பார்வையாளனுக்கு ஒரு புதுவித அனுபவத்தை தர இயலும் என்பதை வெற்றிகரமாக நிரூபித்த இயக்குனர்கள் வரிசையில் தவிர்க்க முடியாத இடத்தை பிடித்திருப்பவர் குவெண்டன்.

இவரை கவர்ந்த - பாதித்த இயக்குனர்கள், இத்தலியன், அமெரிக்க, மெக்ஸிகோ என கலவையான திரையுலக படைப்புகளை கண்ணுறும் வாய்ப்பு மற்றும் தன் பதின்ம வயதில் வாடகைத்திரைநூலகம் (Rental Video Library) ஒன்றில் வேலை பார்த்த அனுபவம் என அவருக்கான தளம் மிகவும் பரவலான, ஆழமான ஒன்றாக அமைந்துவிட்டது.

ரம்மி ஆடுவோர் பலரை பார்த்திருகலாம், அவர்கள் நேர்வரிசையில் கார்டுகளை வைத்திருக்க மாட்டார்கள் ஆனாலும் ஆட்டத்தை முடிப்பதற்கான அனைத்து கார்டும் அவர்கள் கையில் இருக்கும். Consciously Distorting the Order to deceive the viewers.

உலகத்தை திருப்பிப்போடும் நெம்புகோல் திரைப்படங்கள் அல்ல அவரது. கொஞ்சம் கூர்கவனம் கொண்டவர்களுக்கானது, சிறு மாய விளையாட்டின் மூலம் ஒருவித மயக்கத்தை உண்டுபண்ணும் பார்வை அனுபவம் அவ்வளவே. படத்தின் முடிவான செய்தி என்ன? ஒன்றுமில்லை. கதைகளை படிப்பதால் என்ன பயன்? பெரிதாக ஒன்றூமில்லை. ஒரு வாசிப்பனுபவம், அதுபோல இது ஒரு திரை அனுபவம்.

அரசியல் பார்வைகள் மற்றும் சமூக செய்திகள் அற்று ஒரு நிகழ்வின் வெவ்வேறு பரிமாணங்களை காட்டி அதில் பங்கு கொண்ட பாத்திரங்களின் அகபுற பாவனைகளை நமக்கு கோடிட்டு காட்டி, சில இடங்களில் நம்மையே யூகித்துகொள்ளச் செய்து தன் படைப்புகளை கட்டமைத்திருப்பார் குவெண்டன்.

எதையும் கோர்வையாக பார்ப்பது நம் மூளைக்கான வேலையை குறைக்கிறது. கவனத்தை குவிக்காமல் மனதை மென்மையாக்கும் படைப்புகள் ஒரு வகை. கொஞ்சம் ஆழமான பார்வையுடன், கவனத்தை சிதறவிடாமல் ஒரு குறுக்கெழுத்துப்புதிர் போன்ற படைப்பை சிலாகிப்பது மற்றொரு வகை. GenerationX தலைமுறைக்கு படம் எடுக்கும் இயக்குனர் குவெண்டன்.

இவருக்கும் முன்பிருதே அறிவியல் சார் Sci-Fi படங்கள் பிரபலம். தொழில்நுட்ப வளர்ச்சியின் பின் ஒளிந்துகொள்ளாமல், மிகவும் இயல்பாக ஆனால் மாறுபட்ட இயக்க விதிகளின் மூலம் படைப்பை செம்மை செய்பவர். முகத்திலடிக்கும் எடிட்டிங் இருக்கது, கேமரா கோணம் இம்சை பண்ணாது, மிகவும் நீளமான காட்சி அமைப்புகள் என மிகவும் பழைய யுக்திகளை புதுவிதமாக கையாண்டு தன் இருப்பபை நிலைநிறுத்துவார்.

தன்னை பாதித்த படங்களை தன் படங்களில் கோடிட்டு காட்டுவார், பாடல்களும் அப்படியே. காமிக்ஸ் வகையறா மீது அலாதி பிரியம். Kill Bill Vol 1 படத்தில் பத்து நிமிடத்திற்கும் மேலான ஒரு Chapter காமிக்ஸ் (ஜப்பானின் Anime / Manga) பாணியில் உருவாக்கியிருப்பார். அதே பாணியை கமல்ஹாசனின் ஆளவந்தான் படத்தில் காணலாம். அவரின் பெரும்பாலான நாயகர்கள் காமிக்ஸ் பிரியர்களாக இருபார்கள்.

Reservoir Dogs அவரது முதல் திரைமுயற்சி. Roshoman போலல்லாமல், The Dearted போலவும் அல்லாமல் சற்று வித்தியாசமாக வந்த திரைப்படம். வெற்றிப்படமல்ல மேலும் அவரது யுக்திகள் மிகவும் அடிப்படை நிலையில் இருப்பதால் அனாவசியத்திற்கு நீளமான காட்சியமைப்புகள் Sergio Leone'n சாயல், மற்றும் காட் பாதரின் பாதிப்பின்றி படத்தை நிறுவ எட்டுத்துக்கொண்ட கவனம் என குவெண்டனின் தரச்சான்று முத்திரைகள் தன் வரவை திரைஉலகிற்கு அறிவித்த படம், ஆனால் கவனித்தவர்கள் மிகச் சிலரே.

kill Bill 1 போடும் முடிச்சுகளுக்கான விடையாய் இரண்டாம் பாகம் விரிய, இரண்டு பாகத்திற்கான குறிப்புகளும், பின்நோட்ட(flashback) காட்சிகளும் இரண்டு படத்திலும் விரவி நிற்கும். குவெண்டனின் இதுவரையிலான படங்களை பார்த்து அதன் யுக்திகளின் வேரைத்தேடி போனால், அவர் அதற்கான விதைகளை PulpFiction என்ற மரத்தில் இருந்தே பறிக்கிறார். முதன் முதலாக இரண்டாம் உலகப்போரின் பின்புலத்தில் அவர் இயக்கும் படம் இந்த வருடம் வருகிறது, அதை எங்கனம் கையாண்டிருப்பார் என்பது ஒருவாறாக யூகிக்க முடிந்தாலும்-உங்களை போலே நானும் ஆவலுடன் காத்திருக்கிறேன்.

நீளமான காட்சியமைப்புகளை தன் கூரிய வசனங்கள் கொண்டு மெருகூட்டுவது இவரது பாணி. குத்து வசங்கள் அல்ல- கூரிய வசனங்கள். ஒவ்வொரு பாத்திரமும் மூட்டை மூட்டையாக கதைகளை சொல்லும், அதன் தேவையற்று திரைப்படத்திற்கு ஒரு துணையும் புரியாமல் பல கதைகளை இவரது பாத்திரங்கள் சொல்லும். அவை பெரும்பாலும் Beer Talk அல்லது Drive Talk அல்லது Buddies Talk என இயல்பாய் இருக்கும்.

குரூரம் அலல்து Psychotic பாத்திரங்கள் ஒன்றாவது இவரது படங்களில் இருக்கிறது. எதிர்பார்க்காத சமயத்தில் குரூரத்தை படத்தில் நுழைப்பது இவரின் பிரபலமான யுக்தி. நல்லாத்தானே போய்ட்டு இருந்துச்சு என வடிவேல் பாணியில் கையை பிசையும் அல்லது வாயடைத்துப்போகச்செய்யும் குரூரத்தை இவரது பாத்திரங்கள் மிகவும் ரசனையுடன் நிகழ்த்தும், பெரும்பாலான இவரது பாத்திரங்கள் புனைப்பெயரிலேயே அழைக்கப்படும். கடைசிவரை நமக்கு பாத்திரங்களின் பெயர் தெரியாமல் Copper Head, Cotton Mouth, Black Mamba, Mr, Blonde, Mr White என புனைப்பெயர்களே மனதில் நிற்கும். நிற்க.

இந்த விவரணைகள் இவரது படங்களை அலசுவதற்கான குறிப்புகள் அல்லது Prelude. ஏற்கனவே சொல்லியது போல், குவெண்டன் இயக்கியது 6 படங்கள் இதுவரை.

1. Reservoir Dogs

2. Pulp Fiction

3. Jackie Brown

4. Kill Bill 1 @ 2

5. Death Proof

Jackie Brown & Death Proof இன்னமும் பார்க்க வேண்டி இருக்கிறது. அதனால் நான் முதன் முதல் பார்த்த Kill Bill 1ல் இருந்து அலச ஆரம்பிக்கிறேன். இதேயே தான் சென்றமுறையும் சொன்னேனா?

சொல்ல மறந்தது திடீரென கருப்பு வெள்ளைக்கு மாறும் இவரது மற்றொரு பாணி. மிகமிக கிட்டக் கோணம் (Full Close up) இவரது விருப்பம். கை, கால், விரல்கள், பிய்ந்த உதடு, அறுந்த காது என கிட்டக்கோணத்தில் கவனத்தை கவர்வார். இனி படத்தை பார்க்கலாம்.

ஒரு ஊரில் ஒரு கல்யாணம்..... Chapter 1. அடுத்த பதிவில்.

Quentin Tarantino வாரம்

2009-03-04T01:11:00.000-08:00

Sergio Leone விட்டுச்சென்றிருக்கும் கலைநீட்சி Quentin. இருவரது படங்களும் ஒரே சாயலில் அற்புதமான திரைஅனுபவங்களாக மிளிர்வது. Quentin உலகறிந்த இயக்குனர். Non-Linear,falshback, Distorted Chronology என பல வகைகளில் இவரது படங்கள் தனித்து நிற்கும். வன்முறையை கவித்துவத்துடன் சொல்லும் இவரது பாணி பல Cult படைப்புகளை முன்னிறுத்தி அதன் நினைவுகளை நம் மனதில் ஓடச்செய்வது.

இவரது படங்கள் இவரது படங்களில் இருந்தே கிளை கிளையாய் தொடங்கும். அதற்கான குறியீடுகள் படம் முழுவதும் நிறைந்திருக்கும். Pulp Fiction படம் பார்க்கும் போதே நமக்கு தெரிந்துவிடும் அடுத்து ஒரு படம் அதீத கத்தி பிரயோகத்தில் வரப்போகிறது என்று. Bruce Willis டார்ச்சர் சீன் பிற்பாடு Hostel என்ற படமாக வந்தது. அவர் எடுக்கும் கத்தியைக் கொண்டு Kill Bill 1, 2 வந்தது. Kill Billkக்கு முன்பிருந்தே Bruce Lee மீதான Quentinனின் காதலை தெரிந்து கொள்ளலாம். Pulp Fictionனில் Bruce Willis, Bruce Leeன் படம் பார்த்துக் கொண்டிருப்பார்.

Kill Billல் நாயகியின் மஞ்சள் வண்ண உடை, Bruce Lee - Enter The Dragonனில் பயன்படுத்திய அதே உடை. இப்படி பல Cult movies inspiration இவரது படங்களில் இருக்கும். எனினும் Sergio Leone'ன் தாக்கம் பிரேமுக்கு பிரேம் தெரியும். அசாத்திய திறமை படைத்த இயக்குனர். வன்முறை, பழிவாங்கல், Profiling என இவரது படங்களுக்கென ஒரு தனி ரசிகர் வட்டம் உருவாகிவிட்டது. Pulp Fiction, Kill Bill 1 எத்தனை முறை பார்த்தாலும் மனதை அள்ளும்.

கதை புத்தகம் போல Chapter wise கதை சொல்லும் இவரது பாணி மிகப்பிரசித்தம். இசைக்கென தனிக்கவனம் இவரது படங்களில் இருக்கும். Pulp Fiction தீம் மியூசிக் Evergreen Favorite. இவரது படங்களுக்கான ஊற்றூக்கண் இன்னமும் Pulp Fiction தான் என எனக்கு தோன்றுகிறது. இவர் தயாரிக்கும் படங்கள் பெரும்பாலும் இவர் சாயலையே கொண்டிருக்கும். உதாரணம் Hostel, Hell Ride.

Quentin படங்கள் மூன்று பார்த்தாகிவிட்டது. பட்டியல்

1. Pulp Fiction

2. Kill Bill 1

3. Kill Bill 2.

4. Resrvoir Dogs

5. Death Roof

Reservoir Dogs downloaded but not seen yet. Death Roof is getting downloaded. விமரிசனத்தை எங்கிருந்து ஆரம்பிக்கலாம் எனத்தெரியவில்லை. Reservoice Dogs பார்த்துவிட்டு ஆரம்பித்தால் சரியாக இருக்கும். சரி, குவென்டனின் Non-Linear பாணியில் Kill Bill ல் ஆரம்பித்து Reservoir Dogsல் முடிக்கிறேன். அதற்கு நடுவில் அவரது மற்ற படங்கள் பார்க்க நேர்ந்தால் The Chronology will be distorted. :)

கேட் வின்ஸ்லெட் ஆஸ்கர் வாங்கிய The Reader

2009-03-01T20:14:00.000-08:00

பெண்மையும் அழகும் ஒரு சேர அமைந்த நடிகைகள் மிகவும் குறைவு. Zero Size எலும்புக்கூடுகளுக்கு மத்தியில் பெண்மையின் நளினத்துடன் இன்ரும் வலம் வரும் கேட் வின்ஸ்லெட் டைட்டனிக் திரைப்பட கால கட்டத்தில் இந்த உலகின் கனவு தேவதை. நான் +2 படித்த கால் கட்டத்தில் அனைவரின் கனவுகளிலும் கேட் தான். டிகாபிரியோ சிகை அலங்காரத்துடன் என்னுடைய ரோசுக்காக கிருஷ்ணகிரி அரசாங்க குடியிருப்பு வளாகத்தில் காத்திருப்பேன். அதன் நேர் எதிர் இருந்த செண்டரல் பானாவிஷன் திரையரங்கில் வெற்றிகரமாக ஓடியது டைட்டானிக்.

அந்த கேட் - அழகு தேவதை - தன் காதலன் துரத்தி வர, நிலக்கரி எரியும் எஞ்ஜின் ஒளியில் தன் ஸ்கர்ட் பறக்க தேவதை போல ஓடி வருவார் - ஒளி ஓவியம் அது. என்னுடைய Ever Green Romantic Scence அது. அதே கேட்- காலத்தின் மாற்றத்தை தன் உடலில் சுமந்து, அனுபவங்களை தன் நடிப்பில் வெளிக்காட்டி- மனதைத் தொடும் ஒரு கதையாடலை தன் திறமையினால் மெருகூட்டி ஆஸ்கர் விருது வாங்கிச் சென்றீருக்கிறார். புகழ்பெற்ற The Reader என்ற நாவலை தழுவி அதே பெயரில் படைக்கப்பட்ட இப்படம் நெகிழ்ச்சியான ஒரு திரை அனுபவத்தை தருகிறது. மேலும் இது ஒரு உண்மைக்கதையும் கூட.

இரண்டாம் உலகப்போரைப்போல கலை, இலக்கிய, படைப்பு சார்ந்த தளங்களுக்கு ஊற்றுகண்ணாக இருந்த சம்பவம் எதுவும் இல்லை. 60 ஆண்டுகள் முடிந்தும் கதைகளும் சம்பவங்களும், சுயசரிதைகளும் அருவி போல பொழிந்துக்கொண்டிருக்கிறது. என்றும் வற்றாது என்றே நினைக்கிறேன், ஏனெனில் இழந்த ஒவ்வொரு உயிருக்கும் ஒரு கதை என்றாலும் இன்னமும் இலட்சங்கள் மீதமிருக்கிறது.

அழகான Artistic Phorno'வாக ஆரம்பிக்கும் திரைப்படம் வெவ்வேறு திசைகளில் பயணித்து முடிவில் ஆழந்த மௌனத்துடன் நமை கட்டிப்போடுகிறது. இரண்டாம் உலகப்போருக்கு பின்னான ஜெர்மனியில் பேருந்தின் நடத்துனராக பனிபுரியும் ஆன்னா ஸ்க்மிட்ஷ் என்ற நடுத்தர வயது பெண்மணி மாற்றும் அவள் சந்திக்கும் உடல் நலமற்ற 15 வயது பையனுக்குமான உறவு கைக்கிளை எனும் பொருந்தாக்காமமாக மாறி, பொருந்தும் காதலாக உருக்கொண்டு போரினால் அலைக்கழிந்த ஆன்மாக்களுக்கு வசந்தகாலமாகிறது.

தன் பள்ளி பாடங்கள் மற்றும் வெவ்வேறு இலக்கியங்களை அவன் படிக்க அவள் கேட்க பின் கட்டிலில் களிநடனம் புரிய என நகரும் நாட்களின் இன்பம் வெகுநாள் நீடிப்பதில்லை. திடீரென ஆன்னா ஒரு நாள் காணாமல் போக, அதற்கான காரணம் தெரியாமலும் அல்லது தான் அவள் மேல் கொண்ட கோபம் காரணமாக இருக்கலாம் என்றூம் வருந்தும் அச்சிறூவன் பிற்பாடு பள்ளி முடிந்து சட்டக் கல்லூரியின் மாணவனாக சேர்கிறான்.

சட்ட பாடத்தின் நீட்சியாக நீதிமன்றத்துக்கு செல்லும் அவனுக்கு அதிர்ச்சி காத்திருக்கிறது. போர்குற்றவாளியாக ஆன்னா விசாரணையில். அவளின் பிண்ணனி அப்போது தான் அவனுக்கு தெரியவருகிறது. போர்க்குற்றங்களில் பெரிதாக பங்கு இல்லை என்றாலும் வெளியே சொல்ல முடியாத ஒரு காரணத்தால் ஆன்னா குற்றத்தை தான் செய்ததாக ஒப்புக்கொள்கிறாள். அந்த காரணம் என்னவென்று அறிந்தவன் இந்தச் சிறுவன் மட்டுமே.

மிக அழகான காட்சி அமைப்புகள், நிர்வாணத்தை அழகாக படமாக்கியிருக்கும் விதம், ஆர்பாட்டமில்லாமல் அமைதியாக நகரும் படம், நேரான கேமராக்கோணம் என யதார்தத்திற்கு வெகு அருகில் நிற்கிறது படம். இரண்டு குழந்தைகளின் தாயான கேட் நிர்வாண காட்சிகளில் துணிந்து நடித்திருக்கிறார். பெரும்பாலோனோர் வாழ்வில் இதுபோன்ற வெளியே சொல்ல முடியாத முதுபெண்டிரின் தொடர்பு பலருக்கு வாய்த்திருக்கிறது. எனக்கும் அந்த அனுபவம் இருக்கிறது. அதற்கான கட்டமைப்பினுள்ளும் புரிந்துணர்வின் எல்லைக்கோடுகளினுள்ளும் மிக இயல்பாய் நிகழும் அடிப்படை மனித தேவைகள் அது. சரியா தவறா என்ற கேள்விகளின் தேவைகளற்ற வாழ்வின் பகுதி அது.

ஆன்னாவும் மிக கம்பீரமான, ரகசியங்களை சுமந்து திரியும் கண்களுடன் தன் அந்திம காலத்தில் அச்சிறுவனிடம் இருந்து வரும் ஒலிநாடாக்களை கேட்டு எழுதப்படிக்க பழகிக்கொள்கிறார். அவருக்கு எழுதப்படிக்க தெரியாதென்பது தான் அவரின் வாழ்வின் மிகப்பெரும் ரகசியம். அதை நீதிமன்ற விசாரனையின் போது இச்சிறுவன் மட்டும் கண்டுபிடித்து விடுகிறான். அவரால் படிக்க இயலாது என்பதால் ஒலிநாடாக்களில் இலக்கியங்களை, ஆந்தன் செகாவ் சிறுகதைகளை பதிவு செய்து அவருக்கு அனுப்புகிறான் நாய்கன், இப்பொழுது அவன் பெரும் வழக்கறிஞன்.

அந்த வார்த்தைகளை கொண்டே எழுதபடிக்க பயிலும் ஆன்னா அவனுக்கு அனுப்பும் கடிதங்களுக்கு ஒரு பதிலும் வருவதில்லை அவனிடம் இருந்து. அவளின் தண்டனைக்காலம் முடியும் தருவாயில் ஜெயில் வார்டன் அவனுக்கு தொலைபேசி அவளை வந்து கூட்டிசெல்லுமாறு சொல்கிறார். அதற்கு முத்தாய்ப்பாய் இருவரையும் ஒருமுறை சந்திக்க வைக்கிறார். தான் காதலித்து மகிழந்த சிறுவன் இன்று வளர்ந்து நிற்பதை கண்டு மகிழ்வுறூம் ஆன்னா, எல்லோரையும் போலவே அவனும் அவரை ஒரு போர்குற்றவாளியாக பார்க்கும் நிலைகண்டு மனம் வெதும்புகிறார்.

தான் எதிர்பார்க்கும் காதல் அவனிடம் இல்லை என்பது 20 வருட சிறை வாழ்க்கையைவிட கடினமான ஒன்றாக அவரை தாக்குகிறாது. அவன் திருமண வாழ்வும் சரியாக இல்லாமல் போனதன் காரணம் தானாக இருக்கலாம் என நினைத்து, விடுதலையாவதற்கு முதல் நாள் தற்கொலை செய்துகொள்கிறார்.

அதுவரை தங்களுக்கிடையில் இருந்த உறவை யாரிடமும் சொல்லாத நாயகன், தன் மகளிடம் சொல்ல ஆரம்பிக்கிறார், படம் முடிகிறது.

முழுக்க முழுக்க கேட் வின்ஸ்லெட்டின் ஆட்சியில் படம் ஒரு நெகிழ்ச்சியான அனுபவமாக முடிகிறது. நிர்வாணமாக பார்த்த அதே கேட், வயதான தன் 55 வயதையும் சிறப்பாக வெளிப்படுத்துகிறார். தான் ஒரு எழுத்தறிவில்லாதவள் என்பதை வெளியே சொல்வதை காட்டிலும் சிறைத்தண்டனையே பரவாயில்லை என நினைக்கும் அவரின் பிடிவாதம், அம்மக்களுக்கேயான வெகுளித்தனத்தை காட்டுகிறது.

சந்தர்ப்பமேற்படுத்திக்கொண்டாவது படத்தை பார்த்து விடுங்கள்.

நுவோ சினிமா பெரடிசோ

2008-06-03T10:14:00.000-07:00

Nuovo Cinema Paradiso

திரைப்படங்கள் நம்முள் கிளர்த்தும் நுண்ணிய நினைவுகள்- நம் பெற்றோரோடு நாம் கண்டு களித்த முதல் திரைப்படம், நம் மனத்துக்கு பிடித்த நடிகர்கள், வசனங்கள், காட்சி அமைப்புகள், நட்பு வட்டாரத்துடன் சிலாகித்த திரைப்படங்கள், காதலியோடு பகிர்ந்து கொண்ட திரை நினைவுகள் என வாழ்வின் பெரும்பகுதியை நிரப்பி நிற்கும், துருத்தல்கள் இன்றி.

நமக்கு நினைவற்ற கைக்குழந்தை வயதில், நம்மோடு சென்றதாக அம்மாவோ பாட்டியோ சொல்லும் திரைப்படங்களை இப்போது காணுகையில் நம்முள் தோன்றும் குறுகுறுப்பின் நிறத்தை எந்தத்தூரிகையும் வடித்துத்தர இயலாது. மாதத்திற்கு ஒன்று அல்லது இரண்டு, செவிவழி சிலாகிப்புகள், எழுச்சிகள் மற்றும் அதன் வாழ்வியல் தாக்கங்கள் என நம்முள் நிறைந்துநிற்கும் படங்களின் எண்ணிக்கையை 100 அல்லது 200 என எளிதில் தொகுத்துவிடலாம்.

நினைவு தெரிந்த நாள் முதல் திரைப்படங்களை காண்பிப்பதையே வாழ்க்கையாக கொண்ட ஆப்பரேட்டரின் மனவெளியில் ததும்பும் எண்ணவோட்டங்களை மொழிபெயர்க்க நேர்ந்தால், அது வெவ்வேறு ஒளிப்புலத்தில் வெவ்வேறு கதாபாத்திரங்கள் நிகழ்த்திச்சென்ற பெருங்காப்பியமாய் முடிவுறும். தினமும் மூன்று நேரம் ஒரே திரைப்படத்தை மாதக்கணக்கில் பார்க்கும் மனிதனுக்கு மனப்பிறழ்வு ஏற்படாமலிருந்தால் தான் அதிசயமே!

காலம் ஒரு தவிர்க்கமுடியாத காரணி, வாழ்க்கையாகட்டும், படைப்புகளாகட்டும், வரலாறாகட்டும், அதன் வீரியத்தை குறைத்து மதிப்பிட இயலாது. துளிகள் திரண்டு புதுப்புனலாகி மடையுடைத்து வரும் காட்டற்று வெள்ளமென நம் வாழ்வின் கரைகளை கரைத்துச் செல்லும் காலத்தின் வெவ்வேறு படித்துறைகளில் புனலாடி, விளையாடி கரைநின்று நீரோட்டம் கண்ணுறுகையில் மனதில் நிறையும் வெறுமையின் ஆழத்தில் தொக்கி நிற்கும் ஒருதுளி ஈரமென விகசிக்கும் கடந்து வந்த வாழ்க்கை.

காலமும் காவியமும்(திரைக்) இருபுலமாக கொண்டு வாழ்வியல் ஈரங்களை மனிதநேயப் பார்வையில் நிரவிச்செல்லும் திரைப்படைப்பு நுவோ சினிமா பெரடிசோ. படைப்புகளின் வெற்றி அதன் விவரனையில் இருக்கிறது. கதை மாந்தர்கள் இயங்கும் கால கட்டத்திற்கான பின்புல அமைப்பும், அவர்களின் பார்வையின் வழியே பதிவுசெய்யப்படும் படிமங்களும் என ஒரு படைப்பிற்கான நுண்ணிய விவரனைகள் அந்த படைப்பின் தரத்தை மெருகூட்டும் ஊக்கிகள்.

ஒரு திரையரங்கை பிரதான பாத்திரமாக்கி உலாவ விட்டுருக்கிறார் இயக்குனர். 40களில் இருந்து 90 வரையிலான அந்த திரையரங்கின் வாழ்வோடு இழைந்தோடும் பல கதைமாந்தர்கள், அவர்களின் சமுதாய அமைப்பு, வளர்சிதை மாற்றங்கள், தொழில்நுட்ப வளர்ச்சி என ஒரு முழுவட்டத்தை பூர்த்தி செய்து ஒரு முழுமையான படைப்பை நமக்களித்திருக்கிறார் இயக்குனர்.

குழந்தை இல்லா திரையரங்கு ஆபரேட்டருடன் நட்பு கொள்ளும் தந்தையற்ற சிறுவனின் வாழ்க்கை பயணம் அந்த திரையரங்கின் இருக்கைகளினூடாக, திரையில் பதியும் ஒளிக்கீற்றினூடாக, அந்த அரங்கை நிறைக்கும் சிகரெட் புகையினூடாக, அவன் வயதோடு சேர்ந்து குறையும் நடிகைகளின் உடைகளினூடாக, அவனுக்கென கவலைப்படும் அல்பிரெடோ எனும் ஆபரேட்டரினூடாக மதை வருடும் விதமாய், அதுவரை வெளியாகியுள்ள இத்தாலியன் திரைப்படங்களுக்கு சமர்ப்பணம் செய்யும் வகையில் அழுத்தமாக உருவாக்கியிருக்கிறார் திரைப்படத்தை, இயக்குனர் Giuseppe Tornatore.

புகழ்பெற்ற இத்தாலியன் இயக்குனருக்கு அவர் கிராமத்தை சேர்ந்த அல்பிரெடோ என்ற ஒருவரின் மரணச் செய்தி வந்தடைகிறது. அவரின் நினைவில் மூழ்கும் இயக்குனரின் நினைவுத் தொகுப்பாக, நிகழ் நின்று பின்நோக்கி பார்க்கும் அவரின் சிறுவயது வாழ்க்கையின் ஆவணமாக நகர்கிறது படைப்பு. மிக இலாவமாக திரைக்கதையை நகர்த்துகிறார் இயக்குனர். திரையரங்கு ஒரு உயிரோட்டமான படிமம், அதன் பரப்பில் மிளிறும் வெவ்வேறு சலனங்களாக அந்த ஊரின் மக்களை செதுக்கியுள்ளார்.

ஒரு தீ விபத்தில் அல்பிரெடோ கண்ணை இழக்க, சிறூவயதிலேயே ஆபரேட்டர் ஆகும் நாயகன், தன் பதின்ம வயதில் காதல் வயப்படுகிறான். அவன் வாழ்வின் நீள அகலங்களை அடைத்து நிற்கும் காதல் எனும் கனவை உடைத்து அவனை நகரத்து அனுப்புகிறார் அல்பிரெடோ. அவர்கள் காதல் கைகூடாமல் போக அல்பிரெடோ காராணமாக இருப்பது நாயகனுக்கு தெரிவதில்லை. அவரிடம் கொடுத்த வாக்கின்படி இருபது வருடங்களாக கிராமத்துக்கே வருவதில்லை அவன். அந்த காலகட்டத்தில் இத்தாலியின் மிகப்பெரும் இயக்குனராக பரிணமிக்கும் நாயகன், அல்பிரெடோவின் இறுதிச் சடங்கிற்காக கிராமத்துக்கு பயணிக்கிறார்.

சிறுவயது முதல் Toto கேட்டு நச்சரிக்கும் தணிக்கை செய்யப்பட்ட முத்தக்காட்சிகளின் தொகுப்படங்கிய பெட்டியை அவனுக்காக விட்டுச்சென்றிருப்பார் அல்பிரெடோ. அதை இயக்குனர் தன் வீட்டில் ஓட்டிப்பார்ப்பதாக முடிகிறது படம்.

சிலரது வாழ்க்கையில் இத்தகைய தந்தை மாதிரி ஆன்மாக்கள் மிகப்பெரும் பங்களீப்பை நிகழ்த்தியிருப்பார்கள். உங்கள் அண்ணனோ, தெருமுனை கடைக்காரரோ, பக்கத்து வீட்டு நண்பரோ, யாரோ ஒருவர் நமக்கான பாதையை செப்பனிடுவதில் அதிக உரிமை எடுத்துக்கொண்டு நம் நலனில் கவனம் செலுத்துவார்கள். அவர்களின் செயல் நம் விருப்புக்கு எதிராக அமைந்தாலும், அவர்களை மன்னிக்க முடியாமல் போனாலும், அவர்களை புறக்கணிக்க இயலாது. அத்தகைய ஒரு மனிதரை பற்றிய கதை இப்படம்.

காதல் தோல்வியால் வரும் வேகத்தில் வாழ்க்கையில் அவன் வெற்றி பெற்றிருந்தாலும், அவனது தனிப்பட்ட வாழ்க்கை ஒரு முடிவற்ற வட்டமாகவே இருக்கும். ஊருக்கு வரும் அவன் தன் பதின்ம வயது காதலியை சந்திக்கும்பொழுது, அல்பிரெடோ தான் அவர்களின் பிரிவுக்கு காரணமாக இருந்ததை அறியும் பொழுது அவனுக்கு என்ன சொல்வதென்றே தெரியாமல் சமைந்துவிடுகிறான். ஆனல் அவன் மீதான அவரின் அன்பை எள்ளளவும் குறைசொல்வதற்கில்லை. தந்தையற்றா சிறுவனுக்கு ஒரு அருமையான வழிகாட்டியாய் அமைந்து, தன் அகக்கண்ணால் அவன் வளர்ச்சியை கண்டு களிப்புற்று, வாழ்க்கையை முடித்துக்கொள்ளும் அந்த மனிதர் மீது அபரிதமான மரியாதை பொங்குகிறது படத்தின் முடிவில்.

திரைப்படங்களை படிப்பவர்களுக்கு இது ஒரு அருமையான புத்தகம். அடிக்கு அடி அற்புதமாய் செதுக்கிச் சென்றிருப்பார் இயக்குனர். தவறவிடக்கூடாத அருமையான படைப்பு இது. தெளிவான ஓடையின் குளிர் நீரைப்போல தாகம் தணித்து அமைதி கொள்ளச்செய்யும் படைப்பு. அவரின் இறுதி ஊர்வலத்தன்று பாழடைந்த அந்த திரையரங்கும் இடிக்கப்படுகிறது, நம்முள் மெல்லிய வலிக்கீற்றை நிரப்பி தரையைத் தொடுகிறது அந்த திரை, Cinema Paradiso.

திரைப்படங்களைத் தேடி..

2008-04-02T10:27:00.000-07:00

பதிவின் பெயர்க்காரணம் எளிதில் விளங்கும் என நினைக்கிறேன். உலக சினிமாக்களை கவனித்து வரும் எவரும் அடையாளங் கண்டுக்கொள்ளக்கூடிய படம் சினிமா பெரடிசோ.

நான் ரசித்த, லயித்த உலக திரைப்படங்களை பதிவர்களுடன் பகிர்ந்துகொள்ளும் ஒரு தளமாக இப்பதிவு அமையும். மொழி, கலை, கலாச்சாரம், சமுதாய கட்டமைப்பு, அது சார்ந்த இலக்கியங்கள், இனக்குழு அடையாளங்கள், புவியியல் கூறு சாந்த வாழ்வியல் அம்சங்கள் என ஒவ்வொரு மொழி/தேசம் சார்ந்த திரைப்படங்கள் காட்டும் உலகம் தனித்தன்மையானது.

அதின் நான் கால் நனைத்து சென்ற சில திரைக்காவிய ஓடைகளின் அழகியலை, அதன் குளிர்ச்சியை பொதுவில் சிலாகிக்கும் இப்பதிவில் உங்கள் தெரிவுகளையும் பகிர்ந்துகொள்ளுங்கள், இப்பயணம் மிகவும் சுவாரசியமானதாக இருக்கும்.